Deur Bert Wienholds
Rieks en Tammo zitten weer op heur stee in t winkelcentrum. Zo as ze dat aal doage doun, zunder heur goan de deuren nait lös. t Plaain in d'overdekte promenoade is inricht as terras, mit bloumbakken, plastic stoulen en toavels en n kovvie-automoat. Rieks en Tammo hebben heur hangstee der van moakt. Doar moaken ze de tied dood mit domme plazerij, t slampen van automoatenjoegel en t negern van t winkelnd pebliek. Moar wieder binnen ze nait lasteg.
Doar komt n wicht mit n volle bosschoppentazze tot Albert Heijn uutlopen. Bliekboar het ze praai kocht, Rieks zugt gruine bloaden boven de tazze uutsteken.
“Hee, wichie. Wichie! HEE, WICHIE!”
“Joa, wat?!”
“Gaaist praai eten?”
“Nee.” Ze blift even stoan, krigt de praai uut de tazze en holdt hom draaigend omhoog. “Dizze praai is nait veur t eten. Doar haauw ik vervelende olle kirrels mit op kop. As k weerom kom binnen ie aan de beurt!”
“O.” Op zo'n reaksie haar e aiglieks nait rekend. Mainsttied zeggen lu niks en lopen mit n vergrelde kop deur, wat veur Rieks den weer aanlaaiden is om ze nog wat noa te roupen. Moar nou het hai niks te zeggen.
 |
| Bert op de pc aan t schriev'n |
t Wicht stekt de praai weer in de tazze en lopt wieder. Noa n meter of tiene draait ze zoch even om: “Of wil je t mit n stokbrood, k mot toch nog noar de bakker!”
Rieks zegt nog niks, moar Tammo bemuit zoch der mit: “Mag t ook n Grunneger kouke wezen, doar krigt Rieks laiver mit op kop!”
“Aine mit krìnten?”
“Dat dut niks, as der moar gain sekoade in zit, mag Rieks nait hebben van dokter.”
“Hol die de bek, Tammo!” Nou vindt Rieks der niks meer aan. Zulf altied oetsen, moar as aine der op deurgaait …
“Zugst wel, dat krigst mit aal dien geklier … Of bist nou nareg? Waist wat, ik moak t goud, krigst n bakkie joegel van mie.”
 |
| Ain klap mit n stokbrood? |
“Vergees kovvie van de winkeliersverainen, dat kin k ook wel votgeven.”
“Doar mekkerst aans ook ja nait over. En krigst der dammee ook nog kouke bie.”
“k Huf gain kovvie.”
“Den nait. Zulf waiten, hor. Ik dou mie der nog aine in.”
Zo zitten ze weer op heur stee, sikkom d'örde van de dag. Moar nou even gain domme plazerij. Tammo kikt wat om zoch tou en slampt zien automoatenjoegel, Rieks naart wat veur zoch uut.
Den kletst der wat op Rieks zien kop. Hai krigt n doodschrik. Tammo lacht zoch de buutse uut, hai stikt sikkom in zien automoatenjoegel. Veur Rieks zien neuze verschient wat hai net op zien koale kop vuilde. Gruine bloaden. Verhilderd kikt Rieks om.
Doar staait t wicht, mit de praai in d'haand: “t Spiet mie donders, der was gain Grunneger kouke meer!”
JF; Dit verhoal stait op de webstee van Bert....zug http://www.gefokust.nl/schrieverij/verhoalen
Bert is ook redacteur van tijdschrift Kreuze. Was dat veur iets Bert? "Kreuze is n 'opdroads' tiedschrift veur elkenaine dij in de Grunneger toal schrift, veuraal de begunnende, hobby- en amateurschriever." 
"Bert Wijnholds (...) maint dat e nog schriever worden kin". Den mag der wel schrieverij kommen. n Eerste verhoaltje: http://www.gefokust.nl/schrieverij/verhoalen …
Geen opmerkingen:
Een reactie posten